Mugarik gabeko lanuztea hasi zuten San Lazaro egoitzako langilek maiatzaren 13an, eta astelehenean hasi zuten kanpaldia Maalako kioskoan, euren gatazka gizarteratzeko asmoz. "Hitzarmen duina" eta Espainiako Gobernuaren erreformak Gipuzkoako adinekoen zentroetan eraginik ez izatea eskatzen dute oinarrian. elgoiBARREN atariak lan gatazka honetako alde ezberdinak batu ditu eta euren iritzi eta ikuspuntuak jaso ditu honako bideoan.

Lanzaroteko Ironman entzutetsuaren 22. ekinaldia jokatu zen joan den zapatuan. 3,8 kilometro igerian, 180 kilometro bizikletan eta 42 kilometro korrika. Triatleta askoren ametsa da proba hori eta Ibon Gabilondok bete du amets hori. Bere lehen ironmana osatu zuen elgoibartarrak Kanariar Uharteetan, eta, gainera, postu eta denbora aipagarriak lortu zituen. 10 ordu, 21 minutu eta 53 segundo lehian aritu ostean, sailkapen nagusiko 81. postuan sailkatu zen (1.727 lagunek amaitu zuten proba).

 

Bost baietz! saioaren atal berriak estreinatzen ditu maiatzak 27an Euskal Telebistak, eta herriz herri dabiltza grabazioak egiten. Saio horretan, Julian Iantzik dirua banatzen du egunero Euskal Herriko kaleetan. Aurkezle ilehoria Elgoibarrera etorriko da zapatu honetan (maiatzak 25), Trinitate jaietan murgilduta egongo diren lehiakide elgoibartarren bila.

Iritsi dira Trinitate jaiak, eta urtero bezala, egitarau zabala izango dugu asteburuan Elgoibarren zein Mendaron. Ume, zahar zein gaztek izango dute non aukeratu eta gozatu! 2012ko Trinitate jaietako bideoa duzue goikoa. (egitarauak dauzka)

Eduardo Chillida Euskadiko 11. Olinpiada Matematikoan lehen postua lortu Guillermo Hijanok, Elgoibarko institutuko DBHko 2. ikasturteko ikasleak. Bere anaia zaharragoak {Albertok} duela bi urte irabazi zuen txapelketa bera irabazi du, hain justu ere, Guillermok. Ekainean Espainiako txapelketan hartuko du parte Andorran.

 

Elgoibarko VIII. Kirol Argazkien Lehiaketa abian dela jakinarazi du Elgoibarko Udalak. Era berean, lanak aurkezteko azken eguna uztailaren 13a izango dela ohartarazi dute. Lehiaketara kirolarekin zerikusia duten era guztietako argazkiak aurkeztu daitezke. Ondoko irudian, iaz sari nagusia irabazi zuen BTT izeneko argazkia, Joaquin Sanchez ermuarrarena.

Aurten 50 urte egin dituela-eta, Elgoibarko Izarra Kultur Elkartea omenduko du Trinitateetako Nagusien Danborrada antolatzen duen Atabal elkarteak. Era berean, aurtengo berrikuntza eta xehetasun nagusien berri eman du elkarteko kide Juan Carlos Arrietak. Euskal kirolen inguruan antolatu duten danborradan aldaketa nabarmen bat egongo dela aurreratu du Arrietak, orain arte jeneralaren eta jeneralaren emaztearen rolak bete dituzten Begoña Arizmendik eta Antxon Bergarak agintari berriei pasako diete-eta danborradako aginte makila. (goiko bideoan iazko danborradako zenbait une)

 

Murgil eskubaloi taldeak Usurbilgo eskubaloi taldea menderatu zuen zapatuan Zumarragan jokatutako Gipuzkoako Txapelketaren finalean: 11-24. Gipuzkoako txapeldun berriek Durangon jokatuko den infantil mailako Euskadiko Txapelketan parte hartuko dute asteburuan. (bideoa dauka)

 

Elgoibarko Gaztetxeak hartuko du, datorren barixakuan (maiatzak 24), Plazatik Gaztetxera bertso txapelketako bigarren faseko lehen kanporaketa. Aurreko kanporaketetan sailkatzea lortu duten lau bertsolari bikotek abestuko dute Elgoibarko saioan.

 

2005etik 2009ra bezalako gogotsu eta grinatsu heldu dio aro berriari Patxi Baztarrikak, Hizkuntza Politikarako sailburuorde lanetan. Euskararen egoera, Jaurlaritzaren lehentasunak, dirulaguntzak eta Tokikom bezalako elkarguneak ditu berbeta gai elkarrizketa honetan.

 

Viento Sur saskibaloi taldeak igoera kanporaketako joaneko partida jokatu zuen domekan Olaizaga kiroldegian. Elgoibartarrek Eibarko Ruibal Alquiler de Vehiculos taldearen aurka neurtu zituzten indarrak, Debabarreneko taldeen arteko derbyan, eta eibartarrek irabazi zuten partida 49-64 emaitzarekin. Hortaz, 15 puntuko aldeari buelta eman beharko diote elgoibartarrek itzulerako partidan.

 

Bergarako Udaleko Euskara Batzordeak antolatzen duen Koldo Eleizalde literatur lehiaketan, bost generotako lanak saritzen dituzte, eta antzerkien kategorian lehen saria eskuratu dute Taupada antzerki taldeko bi kidek, Ana Moñuxek eta Nere Aspiazuk. Joan zen maiatzaren 3an Elgoibarren estreinatu zuten Arte Eszenikoen Agerraldiko sketx bati esker lortu dute saria.

 

Elgoibarko Udalak eta Eroski Fundazioak elkarlanean aztertuko dituzte Elgoibarko gazteen aisialdirako “joerak eta premiak” zeintzuk diren. Hurrengo sei hilabeteak emango dituzte horretan, eta diagnosi batean jasoko dituzte emaitzak. Ekimenak, 13 eta 30 urte bitarteko gazteen aisialdi-ohiturak eta alkoholaren kontsumoa aztertuko ditu, besteak beste.

 

Eibartar batek {Nerea Oteizak} irabazi du aurten Elgoibarko Trinitate jaietako danborradarako kartel lehiaketa, eta, aldiz, elgoibartar batek irabazi du San Juanak 2013 Eibarren kartel lehiaketa. Izan ere, Olatz Oñederrak aurkeztutako lanak (ondoko argazkian) iragarriko ditu aurtengo San Juan jaiak Eibarren. 

 

Bigarren Mailara igotzeko kanporaketako joaneko partida jokatu zuten Broncesval Montcada eta Concepto Egile areto futbol taldeek Bartzelonan. Bi bider markagailuan atzetik izan ostean, emaitzari buelta eman zioten elgoibartarrek (2-3), Buitre jokalariak sartutako hiru golei esker. Itzulerako partida zapatuan, maiatzaren 25ean, jokatuko dute Olaizaga kiroldegian (18:30).

Kalegoen plazan egitea aurreikusita bazegoen ere, eguraldiaren ondorioz, San Bartolome parrokia barruan egin zuten txistularien alardea. Inazio Bereziartua Dantza eta Musika eskolak antolatutako kontzertuan, 200dik gora musikarik eta abeslarik hartu zuten parte, eta Haritz Euskal Dantzari Taldearen 40. urteurrena gogoan eduki zuten. Goiko bideoan ikus ditzakezue kontzertuko zenbait une. (argazkiak eta bideoa dauzka)

 

Greban dauden San Lazaro zahar etxeko langileak Maalako parkera irten dira protesta egitera. “Hitzarmen duin bat” eskatzeko hasi zuten greba orain dela bi aste, eta hitzarmena sinatu arte bertan jarraituko dutela adierazi dute.

 

• Udalak adierazi du ez daukala erantzukizunik zahar etxeen auzian (2013-05-18)
• Eguneko zentroa kudeatzen duen enpresarekin akordiorako oinarriak lotu ditu ELAk (2013-05-16)

Mintzalagun egitasmoaren urteroko eguna ospatuko da ekainaren 1ean Elgoibarren: Mintza Eguna. Elgoibarko Izarrak egun osoko programazioa prestatu du, eta bazkariko tiketak eskuratzeko epea maiatzaren 24an bukatuko da. Mintza Eguna ez dela soilik Mintzalagun egitasmoan parte hartzen dutenentzako antolatutako ospakizun eguna nabarmendu dute antolatzaileek. Hala, euskararen aldeko ospakizun jaira batzeko deialdia egin dute, goiko promozio bideoan ikus daitekeen moduan.

Adineko egoitzetako gatazkan Udalaren zeregina zein den argitu du Alfredo Etxeberria Elgoibarko alkateak {astelehenetik greba mugagabean daude Gipuzkoako hainbat zahar etxe, tartean Elgoibarko San Lazaro egoitza}. Alkateak adierazi duenez, gatazka horretan hiru aktore protagonista daude: Gipuzkoako Foru Aldundia, patronala eta langileak. Bere iritziz, horiei dagokie irtenbide bat aurkitzea. "Udalak ez du erantzukizunik", esan du.

 

• Eguneko zentroa kudeatzen duen enpresarekin akordiorako oinarriak lotu ditu ELAk (2013-05-16)

Kalebarren plaza betetzeko deia egin du Herrirak zapaturako (maiatzak 18). Bakea lortzeko bidean, presoen eta erbestean dauden herritarren eskubideak errespetatzeko eskatu du Herrirak: presoak Euskal Herrira ekartzea, gaixotasun larriak dituztenak aske uztea, kartzela zigorren luzatzeak amaitzea eta bizi osorako espetxe zigorra suposatzen duten neurriak derogatzea.

 Gainera, zapatuko ekitaldiari soinu banda jarri dio Elgoibarko Herrirak. Letrak Uxue Alberdik jarri dizkio eta Koello-104 talde elgoibartarrak jarri dio musika. Goiko bideoan entzun dezakezue Herrirak sortutako kanta. (abestiaren letra eta egitaraua dauzka)

 

Nerea Oteiza Zubiaurre eibartarrak (ondoko argazkian, erdian) irabazi du Trinitate jaietako danborradarako kartel lehiaketa. Irabazleak 300 euro jaso ditu.