Bere bost seme, 11 biloba, 10 birloba eta gainontzeko senitartekoez inguratuta ospatu zuen Margarita Olañeta Areitioaurtenak bere 100. urtebetetzea joan zen zapatuan, maiatzaren 24an.

Burua argi eta sasoi onean ailegatu da Margarita 100 urte egitera eta ez dauka erreparorik bere sekretuak zein diren argitzeko. 

 

Ermuan jaio eta Elgoibarrera ume zain
Margarita Olañeta Areitioaurtena, 1908-ko maiatzaren 24-an Ermuan, Estazio kalean, jaio zen. Bertan bizi izan zen, Elgoibarko Gabilondo senitartekoak bisitan Ermura joan eta ume zaintzaile bat behar zutela esan eta Margarita Elgoibarrera etorri zen arte. Bere amak esan zion “ixilik egonari, hemen badaukazu ta lana, nola jungo haiz ba Elgoibarrera!”. Amari kasurik egin ez, eta 14 edo 15 urte zituela Elgoibarrera etorri zen, Gabilondotarren etxera.

Elgoibarrera ezkondu zen 23 urterekin
22 urte zituela Roque Fernandez de Jauregui Soria elgoibartarra ezagutu, eta 23 urterekin ezkondu ziren. Urte betera bere lehenengo semea izan zuten, Angel. Ondoren Pedro, Ignacio, Conchi eta Carmen jaio ziren.
Roque tren geltokiko arduraduna zen, eta geltokiko etxean bizi izan ziren hainbat urtez, bai Elgoibarren, eta baita Deban ere.

 

Urtebetetze egun handia
Zapatuan100. urtebetetzea ospatu zuen, bere bost seme alaba, 11 biloba, 10 birloba eta gainontzeko senitartekoez inguratuta. Senitartekoen esanetan “egun handia” izan zen zapatukoa: 13:00etan meza ospatu zuten bere omenez Madalako elizan, lore eskaintza eta guzti. Meza bukaeran, Miren, Haizea, Olatz eta Maddi, biloba eta birlobek, dantza egin zioten. Meza ondoren eztarria busti eta Txarridunan bazkaltzera gonbidatu zituen Margaritak senitartekoak. Postrean, zorionak abestu ondoren, 100 zenbakia zeraman tartako kandelei putz egin eta opariak jaso zituen.

100 urtera sasoi onean ailegatzeko sekretua
100 urtetara hain sasoi onean heltzearen sekretuaz galdegin genionean, zera erantzun zigun: “lan asko eta lasai bizi”. Bere ingurukoek ere ez dute dudarik: “Margarita oso pertsona baikorra da, beti aurrera begiratzen duten horietakoa. 100 urte harrapatzearen sekretua, bere buruari jartzen dizkion helmuga pertsonalak dira: familiako norbait ezkontzen denean, ezkontzara sasoi betean heltzea du helburu, birlobaren bat jaiotzear dagonean, umea ezagutzea etab”. Bere buruari jarritako azken helburua 100 urte betetzea zen eta zapatuan lortu zuen. Zein ote du hurrengoa? Beste urte bat bizi ahal izatea.
Burua argi eta arazorik ez euroarekin
Burua argi dauka bere 100 urterekin ere, eta gaur egungo ia edozein gairen inguruan berba egiteko gai da; baita euroa maneiatzeko ere. Gabon Zaharretan, urtero, ordu txikietara arte egoten da familiakoekin Bingoan jolasten. Hala ere pena bat dauka: urte gutxiago ez izatea bidaiatu ahal izateko.

 

 

  ∞ Lotura duten albisteak:

• Teodosia Iriondok 101 urte egin ditu (2008-04-02 elgoiBARREN.net)

 

 

 

---

Notizi honen berri emateko