Ertzaintzaren agenteek Elgoibarko hiru bizilagun: G.L. (19 urte), N.G. (26 urte) eta I.L.B. (36 urte) atxilotu zituzten martitzenean (apirilak 29), Zornotzan, Zaratamoko enpresa batean ia 3.000 kilo kobre ostea egotzita.

• Urtarrilean antzerako gertakari baten berri eman genizuen: Bi elgoibartar atxilotu dituzte 600 kilo kobre lapurtzen saiatzeagatik Gabirian (2008-01-30 elgoiBARREN.net)

 

Ertzaintzako iturriek jakinarazi dutenez, atxilotuak iristeko oso zaila den inguru batean harrapatu zituzten, Boroa auzoko auzo-bide baten ondoan, turismo batean kobrezko piezetako batzuk sartzen ari zirenean. Ostutako kobrearen erdia berreskuratu dute.

Gertakariak joan zen domekan, hilak 27, izan ziren. Zaratamoko enpresa bateko arduradunak kobrezko material ugari ostu ziotela jakinarazi zion Ertzaintzari telefono dei baten bidez, eta ostutakoaren zati bat enpresatik gertu dagoen ibai baten bazterrean aurkitu zutela gaineratu zuen. Agente batzuk bertaratuta, kobrezko 25 pieza (hurrupadurak), guztira 800 kilotik gora, eta hiru ontzi pneumatiko eta nylonezko soka batzuk aurkitu zituzten, polearena eginez ostutako materiala ibaiaren ertz batetik bestera eramateko prest.

Ertzaintzaren segadan erori ziren
Egun horretan bertan, Zornotzako Udaltzaingoak kobrezko materiala zuten 20 bat pakete aurkitu zituen asfaltatu gabeko pista batean, bertara iristeko oso zaila den toki batean, Boroako gasolina zerbitzugunetik 2 kilometrora. Ertzainak bertaratu ziren eta, aurkitutako materiala aztertu ondoren, Zaratamoko enpresan ostutako material guztiaren zati bat zela baieztatu zuten. Jarraian, Ertzaintzak zaintza operazio bat jarri zuen ostutako materialaren inguruan, lapurretaren egileak material hori guztia ibilgailuren batean eramatera helduko ziren zain.

Astelehenean, goizeko bederatziak aldera, Nafarroan matrikulatutako Opel turismo bat, Astra Caravan modelokoa, agertu zen bertan. Zaintza lanetan ari ziren ertzainek hiru gizonezko ikusi zituzten bertatik jaisten eta ostutako materiala bertan sartzen. Jarraian, zenbait patruilak ibilgailua geldiarazi eta, autoaren atzeko aldean ostutako kobrea zeramatela baieztatuta, atxilotu egin zituzten D.G.L. (19 urte), N.G. (26 urte) eta I.L.B. (36 urte) Elgoibarko bizilagunak, ondarearen kontrako delitu bat egin izana egotzita. Ertzaintzak ikerketa zabalik du oraindik ostutako gainerako material guztia berreskuratzeko.

 

 

 

---

Notizi honen berri emateko