Peruko Huayhuash mendikatean dagoen Rondoy (5.879 m.) mendian 900 metroko bide berri bat ireki du Aritza Monasteriok. Huaraz (Peru) herrian mendi gidari lanak eginez bizi den mendigoizale elgoibartarrak Mikel Saez de Urabain euskaldunarekin batera lortu zuen “Bagabiltza” bidea irekitzea.
“Bagabiltza” izeneko 900 metroko bide berria
“Bagabiltza” izena jarri zioten Monasteriok eta Saez de Urabainek Peruko Rondoy mendiaren mendebaldeko aurpegian ireki zuten 900 metroko bide berriari. Eguraldi txarraren ondorioz 7 egun kanpinean sartuta itxaron behar izan zuten mendian sartzeko. Gauzak azkarrago joan ziren gero: 30 ordutan lortu zuten bide berria irekitzea. Atsedenik gabeko 30 orduko mendi jarduera gogorra izan zen, ordea.
Emaitza: 900 metroko bide erabat glaziarra (VII/5 zailtasuneko zatiekin). Bideak OZ+ (Oso Zaila +) zailtasuna merezi zuela adostu zuten Aritza Monasteriok eta Saez de Urabainek. Tontorrera eramango zituen erlaitzera (5.800 m.) gauez (21:30ak pasata) iritsi zen eskalatzaile bikotea, eta erlaitzaren handitasuna ikusirik, tontorrera egin beharrean beheranzko rappelekin hasteko erabakia hartu zuten, zuhurtziaz. Helburua lortua zuten, bide berria irekita zegoen. Tontorrak baino bidea nondik eta nola igotzen den da garrantzitsua mendizaleontzat.
Mendi ikusgarria, zaila eta ezezaguna
Kokapena: Huayhuash mendikatearen iparraldean dago Rondoy (5.879 m.) mendia. Peruko Andeetako mendikaterik ezagunena Mendikate Zuria den arren, 20 mendikatetik gora daude Inken herrialdean. Horietako bat da Huayhuash, hedaduraz herrialdeko bigarrena (30 kilometro luze eta 10 kilometro zabal). 5.000 eta 6.000 metrotik gorako hainbat mendik osatzen dute mendilerro ikusgarria, Yerupajá (6.634 m.) izanik mendikateko garaiena eta herrialdeko bigarren tontorra. Rondoy mendia ez da 6.000 metrotara iristen, baina teknikoki zailtasun handiak gainditu behar dira tontorra egiteko.
Lehen igoera: 1961ean igo zuten estreinakoz Walter Bonnati eta Andrea Oggini mendizale mitikoek, iparraldeko hormatik igo ere. Ordutik mendizale gutxi saiatu dira Rondoy igotzen, eta saiakera gehienak antzuak izan dira. Erronka paregabea Aritza moduko mendizale batentzat. Izan ere, mendizale gutxi ibiltzen diren mendi eta horma ezezagunetarako joera du. Mendi gidari lanak lagatzen dion heinean, urtero mendi jarduera interesgarri bat egiteko ohitura du. Eta ez edonolako jarduerak. Jaso dituen sari eta aipamenak dira aukeratzen dituen bide eta mendien zailtasunaren adierazgarri.
Gonbidapen ukaezia
Euskal Mendizale Federazioak Jarduera Onenaren Saria eman zion 2002an Aritza Monasteriori, Siula Grande mendian ireki zuen bideagatik. Igoera haren inguruko ikus-entzunezkoa prestatzera Euskal Herrira egin zuen azken bisitan ezagutu zuen, hain zuzen, Mikel Saez de Urabain.
Ikus-entzunezkoa prestatzen lagundu zion Mikelek Aritzari. Mendiari buruzko ikuspegi antzerakoa zutela ohartu ziren eta iaz joan ziren estrainekoz elkarrekin eskalatzera. Aritzaren deia ez zen asko luzatu, Rondoy mendiaren argazki batzuren bitartez egin zion mendia elkarrekin eskalatzeko gonbidapena. Gonbidapen ukaezina Saez de Urabainentzat.
Huarazen mendi gidari
Urteak daramatza Aritza Monasteriok Huaraz, Peruko herrian, bizitzen. Mendikate Zuria eta Huayhuash mendikateak oso ondo ezagutzen ditu elgoibartarrak, makina bat zeharkaldi egin baititu mendi gidari lana dela-eta.
|
Ni neu 2006-11-07 18:56:06
Gora Euskal Herriko mendizaliak! Hia mendiari buruzko albiste gehiago ateratzen dituzuen, neri interesatzen zaizkit behintat eta gustura irakurtzen ditut. Animoak Aritza-ri eta segi horrela!!! | Zorionak, Aritza!
Abel 2006-11-07 22:41:32
Meritu handiko bidea da hori, benetan, bai kirol ikuspegitik eta baita abenturaren ikuspegitik ere. Horrek ez dauka zortzimilakoen inbidiarik. Xapó...!
Euskal Herriko haritzak bezala, zenbat eta zaharrago, orduan eta sendoago dihardu gure Aritzak. Eutsi pioloei urte askoan, eta besarkada bat Elgoibarko mendizaleon partetik.
Aldizkari eta web gune espezializatu hauetan ikus dezakezue bidearen zailtasuna eta edertasuna, argazkitan:
www.alpinist.com/doc/ALP17/newswire-rondoy
www.casadeguias.com.pe/content/view/42/47/
http://www.verticalworld.net/news/news.php?id=424
http://www.desnivel.es/object.php?o=14946&p=share/zoom2.php&image_num=1&preview=0 |
Komentarioak egiteko izena eman behar duzu. Sartu hemen
|
