Arratsaldeko 18:00ak inguruan sartu da Ertzaintza Kimetz elkartean, bertako ondasunen inbentarioa egitera. Espainiako Auzitegi Gorenak urriaren 25ean eman zuen agindua betetzen ari da Ertzaintza. EH-ko hainbat Herriko Tabernatan sartu ostean, Kimetz elkarteari tokatu zaio.

Tentsio uneak bizi dira

  Ertzain askok hartu dute parte operazioan eta zenbait herritar ere bertaratu dira protesta egitera. Ertzaintzaren 3 furgoneta eta mendi-ibilgailu bat azaldu dira arratsaldeko 17:45 inguruan Santa Ana kalean. Horrelakoetan ohikoa izaten den moduan, tentsio uneak izan dira nagusi.

  Miaketak iraun duen bitartean "Errepresioa ez da bidea" pankarta eskuetan zutela, manifestazioa egin du herritar multzo batek kanpokaldean. Manifestazioa aurrez ez abisatzeagatik isuna jarriko diete lagun hauei eta gazte bat identifikatu arazi dute Ertzaintzako agenteek.

Ertzantzaren miaketak ezustean harrapatu ditu 

  Kimetz Elkarte barruan, Zuzendaritzako kide batek jaso ditu operazioaren inguruko Ertzaintzaren azalpenak.

Auzitegi Gorenaren erabakia izan da 

   •Espainiako Auzitegi Gorenak, Araba, Bizkaia, Gipuzkoa eta Nafarroako herriko taberna guztietara "lehenbailehen" batzorde judizialak bidaltzeko agindua eman zuen, lokalen eta ondasunen inbentarioa egin dezaten.

   •Gorenak dioenez, Batasunaren ilegalizazioa guztiz gauzatzeko ondasun horien likidazioa ezinbestekoa da, Batasunak eta herriko tabernek elkarrekin lotura dutela agertzen duten arrastoak daudela uste baitu.

Kimetz Arrano Elkartea da

  Kimetz Elkartea ez da herriko taberna bat, Arrano Elkartea baizik. Dirudienez, Gorenaren agindua ez da herriko tabernetara bakarrik mugatzen. Arrano Elkarte izenpean dauden taberna, lokal edo elkarte guztiak miatzeko agindua dute. Euskal Herrian 400 Arrano Elkarte inguru daude.

---

Notizi honen berri emateko