Halaxe hasi dute eguna, gaur (otsailak 12), Elgoibar Ikastolako 50
ikasle inguruk, bihotzarentzat osasungarria den gosaria hartuaz, alegia.
Gainera, Naiara eta Nerea, herriko bi botikarik emandako elikadura ohiturak
hobetzeko aholku eta argibideak jaso dituzte. (bideoa eta argazkiak dauzka)
Euskal Okindegi Federakuntzak eta
Bihotz Bizi Elkarteak antolatutako ekintza honek, gaizki elikatzearen ondorioei buruz eta goizero behar bezala gosaltzeak duen garrantziaz umeei informazioa helaraztea du helburu. 10-12 urte bitarteko Elgoibar Ikastolako 50 bat ikaslek parte hartu dute gaur gosari bihotz osasungarrian.
Ikasturte honetan, VIII. Edizioa jadanik, Euskal Herriko 91 ikastetxek parte hartu dute: Gipuzkoan, 42; Bizkaian, 39; eta Araban, 10. Guztira 3.800 ikasle inguruk parte hartuko dute kurtso honetan (2007-2008): Gipuzkoan, 1.900; Bizkaian, 1.600 eta Araban, 350.
• Bideo honetan: Gosaltzen hasi aurretik, Naiara eta Nerea botikariek 5 minutuko
hitzalditxoa eskaini diete ikasleei. Besteak beste, gosari bihotz
osasungarriaren osagaiak zeintzuk diren azaldu diete: esnea, kakaoa,
eztia, indioilarra, fruta, ogia eta olioa. Hitzaldiaren ondoren gosaria
hartu dute.
Gaixotasun kardiobaskularra gure gizartean heriotza sortzen duen lehenengo kausa da. Haatik, ezinbestekoa da prebentzioa. Hori dela eta,
Bihotz Bizi Elkarteak ilusio handiz jarri du indarrean Gosari Bihotz Osasungarrien kanpaina hau, Euskal Herriko haurren elikadura ohiturak hobetzeko helburuarekin.
Bihotz Biziren gomendio eta helburuak:
- Gosarian fruta kontsumitu behar dela bultzatzea. Bereziki beharrezkoa da egunean hiru fruta-ale gutxienez jatea, gomendatutako bitamina-, mineral- eta zuntz-kantitateak lortzeko.
- Gosarian opil gutxiago kontsumitzea. Ogia eta azukre gehiegi ez duten zerealak elikagai egokiak dira.
- Esneki (esnea, gazta, jogurtak, etab.) gehiagoren kontsumoa sustatzea, gosaria aldatzeko aukera izateko.
- Ogi integralaren kontsumoa sustatzea eta moldeko ogiarena txikitzea, zuntz gehiago eta koipe gehiago kontsumitze aldera.
- Gosarian oliba-olioaren kontsumoa sustatzea eta gurinarena eta krema azukredun industrialena txikitzea.
- Gosaltzen denbora gehiago ematea. 5 minutu ez dira nahikoa gosari
zuzena egiteko. Komeni da pixka bat lehenago jaikitzea, gosaltzen
gutxienez 10 minutu emateko.
Ekimen honekin
Bihotz Bizi Elkarteak, Euskal Okindegi Federakuntzak eta gainontzeko entitate laguntzaileek, mezu hau argi eta garbi bidali nahi diete Euskal Herriko haur guztiei: Hamar minutu nahikoa dira goizero gosari bihotz osasungarri bat hartzeko: esnea, fruta, ogia, eztia, olioa eta indiolarrarekin!
