Fernando Bert euskal presoak 10 egun daramazki ezer jan gabe, urriaren 15ean hasi zuen gose grebarekin tinko jarraitzen baitu. Azaroaren 8an  bukatuko da frantziar Estatuak ezarri zion kondena eta egun hori iristean, ziurrenik, Espainiako mugan askatuko dute. Ez da estradizio bat izango, kanporaketa bat baizik. Mugan askatzen dutenean, espainiar polizia agertzeko dagoen arriskuaren aurka hasi zuen baraualdia Bert-ek.

Baraualdia, entrega egunera arte luzatzeko asmoa dauka Fernando Bert-ek. Dirudienez, azaroaren 8an askatuko dute, nahiz eta batzuek diotenez, azaroaren 9an izan daiteke. 

Ez da estradizio bat

Estradizio bat izateko espainiar Gobernuak eskatua behar du izan. Ez da hau Bert-en kasua. Besteak beste, kargu gutxi leporatzen baitizkio Espainiako justiziak. Hortaz, frantziar Estatuak Bert kanporatu egingo du kondena amaitzen zaionean. Mugan askatzen dutenean Espainiako polizia agertuko den beldur da elgoibartarra, ordea. Horixe da gose greba hasi izanaren arrazoi nagusia.

Jakin ahal izan dugunez, antzerako beste kasu batzuetan ez da poliziarik agertu. Bestetan aldiz, agertu izan dira, baina atxilotu eta gutxira aske laga izan dituzten kasuak ere badira. Hauek baina, gerta daitekeenaren hipotesien alorrean kokatu behar dira.

Bert-en aldeko ekintzak

Elgoibarko Amnistiaren Aldeko Mugimenduak eta Etxerat-ek Bert-i elkartasuna adierazteko hainbat ekintza antolatu dituzte orain arte (enkarteladak, giza katea, prentsaurrekoak, e.a). Datozen egunetarako prestatu dituzte beste batzuk.

Ekintzen egutegia  

Urriak 25 (eguaztena)

-19:00 Fernando Bert euskal presoaren aldeko enkartelada (Plaza Handian)   

Urriak 27 (barixakua)

-20:00 Etxerat-en enkartelada. (Plaza Handian)   

Urriak 28 (zapatua)

-Goizean zehar, Fernando Bert-entzat mezu bilketa (Plaza Handian)   

Azaroak 1 (eguaztena)

-19:00 Enkartelada (Plaza Handian)  

Azaroak 3 (barixakua)

-19:30 Manifestazioa “Fernan Etxera” lelopean Ondoren, akanpada-baraualdia   

Azaroak 4 (zapatua)

-Goizean, giza katea

---

Notizi honen berri emateko