ELA, SATSE, LAB, CCOO, ESK, UTESE eta SAE sindikatuek deitu dute biharko (urtarrilak 29) egun osoko greba, azken hilabeteotan egiten diharduten negoziazioek esperotako emaitza eman ez dutela ikusita. Hala, deialdia Osakidetzako zentro guztietara egin dute: osasun zentro (anbularorioa) zein ospitaleetara (Mendaroko Ospitalea).

Elgoibarko anbulatorioko argazkia.

Dekretua: Eusko Jaurlaritzak abenduaren 26an dekretu bidez onartu zituen 2009ra arte Osakidetzako langileen lan baldintzak. Hain zuzen, joan zen uztailean, Euskal Autonomia Erkidegoko Medikuen Sindikatuarekin lortutako akordioan oinarritzen da dekretua. Erabaki hura "inposiziotzat" hartu zuten sindikatuek, eta salatzeko, hamabost minutuko hainbat lanuzte egin dituzte urtarrilean zehar. Era berean, Eusko Jaurlaritzak onartutako dekretuarekin negoziazioak "bertan behera" uztea leporatu diote Osakidetzari.
Gainera, Negoziatu arte borrokatuko dugu lelopean kaleratu duten oharrean gaineratzen dute abenduko dekretuak medikuen eskakizunak bakarrik hartzen dituela kontutan, "Mediku Sindikatuak %20 baino ez du ordezkatzen mahai sektorialean eta gainontzeko langileen baldintzei ez diete kasurik egin” azaldu du SATSEko ordezkari Jose Antonio Garciak. Ildo horretatik, Eusko Jaurlaritzak onartutako bigarren dekretuak, karrera profesionalaren ingurukoak, aldi baterako langileen eta langile finkoen artean "desberdintasunak" sortzen dituela ere salatu dute.

Horregatik guztiagatik mobilizazioekin jarraitzeko erabakia hartu dute. Hala, bihar (martitzena) egingo duten grebaren ondoren, otsailaren 12an, 14an, 19an, 21ean, 26an eta 28an bi orduko lanuzteak egingo dituzte goizez eta arratsaldez.

 

Euskaldundu eta gaztetzeko eskaerak 

Osakidetza euskalduntzeko eta lan taldea gaztetzeko eta handitzeko eskatzen dute, besteak beste, sindikatuek. Kategorien zein langile finko nahiz finko ez direnen arteko aldeak murriztea, lan taldea handitzea eta gaztetzea, Osakidetza euskalduntzea eta zerbitzuak ez pribatizatzea dira haien lehentasunak. Prest agertu dira horien inguruan hitz egiten jarraitzeko.

 

    ∞ Lotura duten albisteak:

• Eskaeretan tinko, negoziatzeko prest (berria.info)
• Osakidetzako gatazka, irtenbidetik gero eta urrunago (2008/01/23 LAB sindikatua)
• ELAk eta LABek negoziazio mahai orokorra utzi dute, Osakidetzan eta Irakaskuntzan negoziazioei berriz ere ekin arte (ELA sindikatua)

 

 

 

---

Notizi honen berri emateko