Elgoibarko Udalaren Euskara Batzordeak ekainaren 4tik 10era egindako kale-neurketaren arabera, elgoibartarren % 43,6ak berba egiten du euskaraz gure herriko kaleetan. Azterketa hau egin ahal izateko, 8.232 elgoibartarren hizkuntz jokaera neurtu da.

Azpimargarria da Elgoibartarren euskararen erabilera orokorrak 2003tik aurrera beherantz egin duela pixkanaka-pixkanaka (%44,7→%41,4→ %40,9 → %39,7), baina aurtengoak berriro ere gorantz ekin dio.

 

Hauexek izan dira ikerketaren emaitzak: 

PERTSONAk	EUSKARAZ	%
8.232	3.590	43,6

 

 •  ADINAREN ARABERA zera ageri da:

euskaraz %	GUZTIRA	HAURRAK	GAZTEAK	HELDUAK	ADINEKOAK
	% 43,6	%63,8	% 44,1	% 35,6	% 35,6

Urtez urteko datuak konparatuz gero, adinaren araberako emaitzak beti antzerakoak izaten dira. Elgoibarren, inguruko herrietan bezala, haurrak dira euskara gehien erabiltzen dutenak (% 63,8). Orain arte helduak izan dira gutxien darabiltenak, baina aurten adinekoekin bat egin dute emaitzetan.

 

 •   GIROEN ARABERA zera ageri da:

Giroa	Ikasleen irteera	Jolaslekuak	Erosketa giroa	Familia giroa	Gazte giroa	Txikiteoa
eusk %	42,7	54,1	32,6	35,6	44	41,6

Giro ezberdinei dagokienez, jolaslekuetan, gazte giroan (giro hau ez da larunbat arratsaldetan neurtzen), ikasleen irteeran eta txikiteoan izan dira emaitza hoberenak, ondoren datoz familia giroa eta erosketa giroa. Aurten txikiteoan emandako igoera, iazko %34tik aurtengo %41,6ra, azpimarratzekoa izan da, hala ere, kontuan izan behar da giro hori neurtzen den orduetan jende asko ari dela baita ere erosketak egiten eta bi giroak nahasten direla pixka bat.

Familia giroari dagokionez, iazko neurketan 31tik 39ra igo zen erabilera baina aurtengoan berriro ere % 35,6ra jaitsi da. Datu hori, kezkagarria benetan. Egia da baita ere gero eta zailagoa dela neurtzea familia giroa, umeak eta gazteak oso gutxitan egoten baitira kalean gurasoen ondoan, gaur egun zonalde berdinean egon arren, helduak alde batean daude eta umeak, gurasoengandik hurbil, baina beste ume batzuekin jolasean.

Azpimarratzekoa da baita ere erosketa giroan emandako jaitsiera %41,1etik  %32,6ra. Datu hau

kuriosoa izan da, hori dela eta, Euskara Sailak azterketa sakonagoa egin du, eta ondorengoa nabaritu du: herriko kaleetan oro har erosketa giroan euskara %38ak erabiltzen badu ere, ostegunetan merkadilloa izaten den ingurunean erabilera %19,7ra jaisten dela, beraz, argi geratu da merkatarien hizkuntza erabilerak eragin zuzena duela bezero eta herritarren hizkuntza ohituretan. Iazko neurketa egin zenean ez zegoen merkadillorik herrian, eta ez zen horrelako alderik nabaritzen zonalde ezberdinetan.

Esan beharra dago baita ere gazte giroak iaz galdutakoa berreskuratu duela aurten, iaz 44,3tik 36,9ra jaitsi zen eta aurten 36,9tik 44ra igo da.

Belaunaldi bakoitzak esparru ezberdinetan dituen gorabeherei buruz, esan behar da helduek eta zaharrek gorabehera handiak azaltzen dituztela. Helduen kasuan, jolaslekuetan % 48,2k egiten du euskaraz  baina erosketa giroan % 26,2ra jaisten da helduen erabilera. Adinekoen kasuan, jolaslekuetan izandako igoera, % 26,6tik % 55,1erakoa, alde batera utzita, gainontzeko giro guztietan jaitsiera izan da. Argi geratu da adinekoek helduek bezalaxe haurrekin jolas giroan erabiltzen dutela euskara gehien.

Gazteei dagokienez, txikiteo giroan eta gazte giroan eman dituzte emaitzarik hoberenak, eta gainera, euren erabilera beti izan da%40tik gorakoa giro guztietan.

Haurrei dagokienean, honako hau esan genezake: haurrek, oro har, bataz beste % 63tik gorako erabilera mantendu dutela, gazte giroan eta jolaslekuetan %73,4ra iritsiz.

 

 

Azken urteotan honako hau izan da euskararen erabileraren bilakaera adina kontuan izanik: 

	1995	1997	1998	2000	2001	2003	2004	2005	2006	2007
HAURRAK	%58'9	%68'6	%68	%66’7	% 63	%63,5	%63,6	%58,5	%60,8	% 63,8
GAZTEAK	%25'2	%39'3	%39'1	%37'6	% 40	%43	%41	%36,7	%39,3	%44,1
HELDUAK	%23'4	%26'7	%29'8	%27'6	%25,7	%35,1	%30,6	%31,5	%27,7	%35,6
ADINEKOAK	%39'4	%35'1	%40'6	%33'2	%33,2	%41,1	%40,8	%36,7	%40,3	%35,6
GUZTIRA	31'9	37	40'3	38'3	37,4	%44,7	%41,4	%40,9	%39,7	%43,6

Elgoibartarren euskararen erabilera orokorrak 2003tik aurrera beherantz egin du pixkanaka-pixkanaka (%44,7→%41,4→ %40,9 → %39,7), baina aurtengoak berriro ere gorantz ekin dio, % 43,6ko kopurua 2003 urtekora hurbildu delarik. Eta adinka aztertu ezkero ere, 2003 urteko datuak eta 2007koak oso antzerakoak direla ikus genezake.

Soziolinguistika Klusterrak 2001ean egindako neurketak Debabarreneko erabilera % 37,7koa zela zioen eta Gipuzkoakoa % 29,94koa. Beraz, Elgoibarren ere, beste herri askotan gertatu den bezala, euskararen ezagutza eta erabileraren arteko aldea handia da, erabileraren bilakaera motelagoa baita.

Bukatzeko, esan beharra dago horrelako neurketek euskararen erabileraren bilakaera orokorra zein den jakiteko balio dutela, eta joera orokorra hartu behar dela kontuan eta ez urte batetik bestera dagoen kopuru aldaketa.

 

 

 

---

Notizi honen berri emateko