Astoak irabazi zuen San Antolin auzoko 8 gazteen aurkako desafioa auzoko jaietan (irailak 1) egin zuten dema ikusgarrian. Victorio Zelaiaren astarrak 76 plazako marka ezarri zuen eta auzoko mutilek ezin izan zuten piztiaren lana hobetu. Dema galdu arren, indar faltan ez daudela erakutsi zuten: 66 plaza egin zituzten 600 kiloko harria 20 minutuan arrastan eramanez.

• Iaz behorra, aurten astarra
Iaz behorraren aurka neurtu zituzten indarrak San Antolin auzoko 9 gizonek eta desafioa irabaztea lortu zuten, 52 plaza egin baitzituzten 830 kiloko harriarekin. Behorrak 88 plaza egin zituen arren, gizonak nagusi, behorraren lan erdiak gainditzea baitzen adostutako dema.

 

• Demaren zenbait gorabehera
Aurtengo apustuak bazituen zenbait ezberdintasun iazkoarekin alderatuz. Batetik, Victorio Zelaia eibartarraren astarra izan dute aurkari, iazko behorraren ordez. Bestetik, iaz 9 izan baziren ere, 8 gizon aritu dira indarrean aurten. Eta azkenik, harri txikiagoa mugitu behar izan dute aurten; 600 kilkokoa, 830 kilokoa beharrean. Gainera, parez-pare neurtu dituzte indarrak, alegia, plaza gehien egin dituena izan da irabazlea.

• Ikusle mordoa
Ikusmin handia sortu zuen apustu bitxiak, eta iaz moduan, San Bartolome jaiekin bat egin arren, ikusle mordoa hurbildu zen Usatorre tabernaren aparkalekuan kokatuta zegoen jai gunera. Lanak amaitzear zeudela, animo eta txalo ugari jaso zituzten desafioan parte hartu zuten gizonek, eta hauek, apustua irabazteko aukerarik apenas zutela jabetu arren, zeukaten guztia eman zuten, hustu egin ziren.

 

• ARGAZKI gehiago:

 

 

• Desafioaz aparte, ekintza mordoa antolatu dituzte San Antolineko auzotarrek: txapel jaurtiketa txapelketa, bertso afaria, herri kirolak,... hona hemen bertso afariko eta Lagun artea Elgoibarko herri kirol talde sortu berriak eskaini zuen erakustaldiko zenbait argazki, adibide gisa.

 

Lagun asko hurbildu zen bertso afarira	Uxue Alberdi elgoibartarrak izan zen bertsolarietako bat

 

 

 

 

 

---

Notizi honen berri emateko