Eskola Kirola programari indar berria emateko asmoarekin sortu da Eskola Kirolaren Kontseilua. Herriko ikastetxe bakoitzeko 2 ordezkarik, Udal Kirol Patronatuko 2 ordezkarik eta Foru Aldundiko ordezkari batek osatuko dute Kontseilua. Bestalde, Kontseiluak hartutako erabakiak aurrera eramateko enpresa bat kontratatu du Kontseiluak.

•  Enpresa batek kudeatuko du Eskola Kiroleko Programa
Gorputz-hezkuntzan lizentziatua den Xabier Zabaleta da Eskola Kirolaren Kontseiluak Eskola Kiroleko Programa (pdf) kudeatzeko kontratatu duen enpresako burua. Zabaletak badauka esperientziarik langintza hauetan, Mutriku eta Ondarroan aritu baita aurrez. Bere ardurapean 5 kirol-monitore izango ditu eta hauen zeregina izango da ikastetxeetara joan eta Eskola Kirolean izena ematen duten umeen entrenamenduak gidatzea. Asteburuetako kirol jardueren koordinazioa ere enpresa honetako langileen ardurapean egongo da. Datorren ikasturtean hasiko da lanean enpresa hau eta urtebeterako kontratua izango du.

Alabaina, umeen gurasoek eta kirol talde ezberdinek “berebiziko garrantzia” izaten jarraituko dutela azpimarratu zuen Ramon Mugica, Udal Kirol Patronatuko zuzendariak. “Guztion arteko elkarlana” funtsezkoa dela gaineratu zuen martitzenean (uztailak 10) Udaleko Pleno Aretoan egin zuten Eskola Kirola programa berriaren aurkezpenean.

•  Aspaldiko asmoa
Duela 10 urte ere egin zutela Eskola Kirolaren kontseilu bat sortzeko saiakera gogoratu zuen Kirol Patronatuko zuzendariak, “martxan ere jarri genuen, baina berehala bertan behera laga behar izan genuen. Ia orduko esperientzia aintzat hartuta bigarren saiakera honetan ez dugun hutsik egiten”.
Kontseilu berri hau sortu aurretik hilabeteak daramatzatela ikastetxeekin lanean azaldu zuen Mugicak, “gure aspaldiko helburua zen Eskola Kirolaren antolaketari egitura sendoagoa eskaintzea, eta ildo honetan, guztion artean adostutako estatutuen onarpena aurrerapauso handia izan da". Estatutuok gidatuko dituzte Kontseiluak hartuko dituen erabakien nondik-norakoak.

•  Zer da Eskola Kirola?
Eskola Kirola programaren eginkizuna, Elgoibarren eskola kirola bultzatzea da. Kontuan izan behar da, Eskola Kirola honako hau dela: ikasleak, eskolan hasten direnetik goi mailako beste ikasketa batzuetara iritsi bitartean, eskola orduetatik kanpo eta eskolan bertan, egiten duen edozein jarduera fisiko.

•  Eskola Kirola programaren helburuak:

1. Kirola Elgoibarko ikasle guztiengana hurbiltzea, beti ere, hautaketa eta errendimendu prozesuak alde batera utzita, eta lehiaketara bakarrik mugatu gabe.
2. Eskola Kirolaren helburuekin bat datozen kirol jarduerak eskaintzea.
3. Ikastetxeetan Eskola Kirola  aurrera eramateko eta kudeatzeko beharrezko egiturak sortzea.
4. Kluben partaidetza bultzatzea ikastetxeetan jarduera programak aurrera eramateko.
5. Eskola Kirolean berdintasun eta partaidetza ereduak ezartzea, batez ere aurre-benjamin, benjamin, alebin eta infantil mailetan.
6. Herriko ikastetxeetako eta klubetako teknikarien formazioa eta gaitasuna bultzatzea.
7. Ikastetxe eta Udalaren instalazioak erabiltzeko aukera ematea, beti ere, ondo erabiliko direla ziurtatuz.

•  Kirolak:

Guztira 11 kiroletan parte hartzeko aukera izango dute datorren ikasturtetik aurrera Eskola Kirolaren programa berrian izena ematen duten umeek.

 

• 3 taldekako kirol: futbola, eskubaloia eta saskibaloia
• 8 banakako kirol: atletismoa, xakea, txirrindularitza, pilota, eskalada, mendizaletasuna, tenisa eta igeriketa.
  

   

---

Notizi honen berri emateko