Beste ikasturte bat bete du Elgoibarko Izarrak gestionatu, herriko bi euskaltegiek lagundu eta Elgoibarko Udalak babesten duen programa berezi honek. Programaren helburu nagusia euskaraz hitz egiteko zailtasunak dituztenei aukera bat eskaintzea da; euskaraz berba egiteko beste aukera bat eskaintzea, hain zuzen ere. Helburua bikoitza da: bat, dakitena praktikatzea, eta, bi, ez dakitena ikasteko aukera eskaintzea.

•  27 lagun, 19 euskaldun berri eta 8 euskaldun

Tertuliak programan euskaldunak eta euskaldun berriak elkarrekin jarduten dute. Ikasturte honetan, adibidez, 19 euskaldun berrik eta 8 euskaldunek hartu dute parte. 8 taldetan banatuta egon dira, eta talde bakoitzean euskaldun bat egon da euskaldun berriekin tertulian jarduteko. Taldeak hiruzpalau lagunekoak izan dira gehienak eta, normalean, kafe baten inguruan elkartu dira euskaraz jarduteko. 

•  Lagun arteko afaria

Eta urtean zehar talde bakoitzak bere funtzionamendu propioa izaten badu ere, ikasturteari amaiera emateko Tertuliak programan parte hartu duten 13 lagun elkartu dira afari baten bueltan. Jan-edanak lagun zituztela, urtean zehar bizi izandakoak elkarri kontatzeko aukera paregabea izan zuten denek.

•  07-08 ikasturterako deialdia

Baina Tertuliak programa ez da hemen amaitzen. Atseden txiki bat hartuko badute ere, urrian berriz ere izango dute tertulietan parte hartzeko aukera hala nahi duten guztiek. Irailean zabalduko dute izena emateko epea eta urrian jarriko dituzte martxan. Beraz, euskaraz berba egiteko aukera hau aprobetxatu nahi duten herritar guztiek herriko bi euskaltegietara edo Elgoibarko Izarrak Ubitarten daukan lokalera jo dezakete. Nahi izanez gero, izen-ematea telefonoz ere egin daiteke:

• AEK euskaltegia: 943 74 13 32
• Udal Euskaltegia: 943 74 27 31
• Elgoibarko Izarra: 943 74 16 26

---

Notizi honen berri emateko