Ibon Gabilondo meritu handiko 25. postuan sailkatu zen Zarauzko triatloi olinpiko bikoitzean (2,5 km – 82,5 km – 20 km.). Denbora oso ona (04:30:24) egin zuen Gabilondok, iazko marka (04:52:36) asko hobetuz. Urgazi Triatloi taldeko beste bi kidek ere parte hartu zuten Zarautzen: Jesus Mari Agirretxe 170. postuan sartu zen helmugan eta 305. postuan Iñaki Konde. (Ibon Gabilondori eginiko Elkarrizketa dauka)

• Ikus sailkapen osoa
  
• Ikus bideoa (Etb-1eko Kirolez-kirol saioak egin zuen probaren laburpena)

 

♦ ELKARRIZKETA:

 

Ibon Gabilondo, triatleta:

--25. postuan iritsi zinen Zarautzeko Triatloi gogorrean. Gustura al zaude lortutako emaitzarekin?
Postua baino denbora on bat egitea neukan buruan; 4 h 30 min. inguruan ibiltzea. Denbora horien bueltan ibiltzen banintzen, banekien lasterketa on bat aterako zitzaidala. Halaxe izan zen eta nire egunik onena atera ez bazitzaidan ere gustura bukatu nuen egindakoarekin.

 

 

 

 

--Euskadiko Triatloi Txapelketa ere bazen Zarautzekoa, ezta Ibon?

Distantzia Luzeko Euskadiko txapelketa zen eta Euskadiko lizentziadunen
artean 15-16 egin nuela uste dut.

--Iazko denbora asko (22:12) hobetu duzu aurten.
Iazko denborak ez ditut erreferentzia balekotzat hartzen, egin zuen bero sargoriaren ondorioz txakalaldia izan bainuen. Antxintxikako proban ez nuen ezer jan eta azken 10 km-etan "gasolina" gabe geratu nintzen, erabat hustuta. Irakasgai ona izan zen. Hori dela-eta, beharbada, aurten errespetu larregiz joan nintzela aitortzen dut, sentsazioak asko neurtu nituela, alegia.

--Daukazun hoberena eman duzu, ala badaukazu gehiago ematerik, emaitzok hobetzerik?
Orain dudan sasoi puntu berarekin karrera borobil-borobila ateraz gero, 5 bat minutu inguruan hobetu ahalko nukeela uste dut. Hortik beherako denborak berba potoloak iruditzen zaizkit, 4h20min oso gutxiren esku dagoen denbora iruditzen zait.

--Bero sargoriarekin hasi zineten igerian eta bizikletako proban demaseko ekaitzak mela-mela laga zintuzten parte hartzaile guztiok? Zer nolako eragina eduki zuen eguraldiak kirol jardueran? Nola nabaritu zenuen zuk?
Alde horretatik ez nuen arazo larregi topatu. Igerian kanpoko hotz-beroak ez du eraginik, bai ordea bizikletan, eta igarri nituen beroaren ondorioak, nahiz eta abiadurarekin sortutako haizearekin bero sentsazioa leundu. Zorionez, beroa ez zen iazkoaren parera ailegatu, 35 gradu C-tan egin genuen-eta froga guztia eta hori gehiegizkoa izan zen. Korrika hasi ginenerako ere dezente jaitsita zegoen tenperatura.

--Azter ditzagun 3 partzialak banan-banan
Igerian:
36min 06 s. Ondo jardun nintzen, hasieratik bukaerara arte nahiko aurrean joan nintzen
eta horri esker 400 lagun batera ateratzearen ondorioz egoten diren kolpeak eta bultzakadak saihestu nituen. Zarautzeko hondartzan 34. postuan atera nintzen uretatik.

Bizikletan:
Eman behar nuena baino gutxiago eman nuela uste dut, konformistegi aritu nintzen, beharbada, eta kronometroari minutu batzuk lapurtzeko aukera galdu nuen. Dena dela, asko disfrutatu nuen, batez ere, Zarautzeko herritik pasatzerakoan eta hango jendearen txalo eta animoak jasotzean. Horiek izan ziren triatloiko unerik politenak, dudarik gabe. Horrelakoetan triatleta batek sentitzen duena gauza handia da. 2h 30 min izan zen bizikleta gainean egin nuen denbora eta fresko bukatu nuen.

Antxintxikan:
Ondo hasi nintzen baina 4-12 km. tartean alboko mina izan nuen eta nahiko
larri joan nintzen. Gero pasatu zitzaidan eta erritmoa hobetu nuen. 1h 24
min. egin nuen (20.5 km). Nire helburua 1h 20 minuturen bueltan ibiltzea zenez antxintxika ibili nintzen ahulen.

--Denboraldi guztian bereziki prestatu duzu proba hau. Zergatik, hain justu, Zarautzekoa?
Triatloietan hasi nintzenean triatloi motzak nituen helburu. Gero, kirol honetan murgiltzen hasi ahala, distantzia luzeagoko triatloietarako joera nagusitzen da, triatloiko “esentzia” hor dagoela iruditzen zait-eta. Distantzia luzean, Zarautzen esaterako, ezin da bizikletan zoazela aurrekoaren gurpila hartu, nahita nahiez arauzko distantzia mantendu behar da, eta horrek bizikletako proba gogortu eta erabat indibiduala den esfortzu baten bihurtzen du kirol hau. Distantzia motzetako triatloitan, aldiz, taldean joan daiteke bizikletan. Horregatik diot triatloiko esentzia distantzia luzean dagoela, triatleta osoenak eta zailduenak neurtzen dira distantzia luzean. Aurrez esandakoari, Zarautzeko triatloiak hainbat ediziotan pilatu duen historia batzen badiogu, edozein triatletarentzat ezin erakargarriagoa da triatloi hau.

Bizikletako proba hastear

--Nola prestatzen da gisa honetako triatloi bat? Aurten Euskal Herriko zirkuituko froga batzuk korritu ditut, Oñati, Eibar eta Arrigorriagako duatloiak eta Mimizaneko triatloia distantzia olinpikoan (1500m+40km+10km). Hauetaz aparte, korrikako lasterketa batzuk (Donostiako maratoi erdia, e.a.) eta txirrinduko froga zikloturista batzuk ere bai. Hauek guztiek eta bakarkako ordu askok balio izan dute prestaketa bideratzeko, beti ere planifikazio batekin eta pausoz-pauso.

--Zenbat entrenatu behar da horrelako triatloi batean aurrean egoteko?
Entrenamendu ordu gehien apirilean eta maiatzean izan ohi da, baina batez beste 16-18
bat ordu astean sartu ditut lau hilabetetan zehar, eta aurrez, urtarrilean eta otsailean "oinarria" lantzen da. Intentsitate desberdinak landu behar dira prestakuntza momentuaren arabera, poliki-poliki intentsitatea eta lan bolumenarekin jokatuz.

--Datoren urtean berriz bueltatzeko asmorik?
Momentuz ez dut pentsatu, urrun ikusten dut. Egindakoaz disfrutatu behar da lehenbizi!

--Bizi al daiteke triatloitik? Asko al dira triatloitik bizi direnak?
Euskal Herrian nik dakidala 2 mutil, Llanos anaiak; nazioarteko figurak biak eta 2 neska: Ainhoa Murua zarauztarra eta Virginia Berasategui bilbotarra. Dena den, Euskal Herrian maila oso altua dagoela esan behar da eta triatleta on ugari dago nahiz eta profesionalak ez izan.

--Zein dira zure ondorengo erronka nagusiak?
Larunbatean Lekeition korrituko dut distantzia motzean, datozen asteetan nire gorputzaldia ahalik eta gehien aprobetxatzen saiatuko naiz Euskal Herriko frogetan, agian uztail erdira arte. Gogoa ezetz esaten hasten denean geratuko naiz, beroarekin batera segur aski.

--Ironman bat probatzeko gogorik ba al daukazu?
Triatleta baten kirol bizitzan hurrengo pauso logikoa izango litzateke Ironman
famatua, baina honek entrenamendu bolumena %10-15 igotzea esan nahi du, paper on bat egitea nahi bada. Momentuz nire egungo bizimodu erritmoan; lana, bizitza pertsonala... ez dago horrelako prestakuntza bat aurrera eramateko denborarik. Ez dut ukatuko froga bera korritzeak inbidia pixka bat ematen didanik, festa handi bat baita, baina aurrez egin beharreko sakrifizio guztia gehiegizkoa da. Azken finean hau afizio bat besterik ez da, asko ematen dizu baina kendu ere bai! eta muga non dagoen ikusi behar da. Agian, etorkizunean bai, baina momentuz ezin dut planteatu ere egin.

--Amaitzeko, zurea da hitza.
Gauza bat besterik ez nire aldetik: Hemendik eskertu larunbatean Zarautzera
froga ikustera eta ni animatzera joan zirenei. Eta nola ez, hilabete luze
hauetan lagundu didazuen guztiori, batik bat familiakoei eta
gertukoenei.

 

 

 

---

Notizi honen berri emateko