Hiru alditan parte hartu du Iñigo Larizek Nahaste Borraste proban eta bi irabazi ditu, 2008koa eta aurtengoa. Jorge Gonzalezekin lehia ikusgarria eduki zuen Larizek hasieratik amaierara arte eta hiru segundoko aldea besterik ez zion atera helmugan. David Condek iaz ezarritako errekorretik (18:25) hamazazpi segundora geratu zen Lariz. Denera 33 lagunek parte hartu zuten aurtengo ekitaldian, tartean emakume bakarrak: Ainhoa Lendinezek proba aparta egin zuen eta sailkapen nagusiko hamaikagarren postuan sartu zen helmugan, 21:21 denborarekin. (bideoa, argazkiak eta sailkapenak dauzka)

Goiko bideoaren amaieran ikus ditzakezuen adierazpenetan argi laga zuen moduan, garaipenaren bila ateratzeaz gain, errekorraren bila ere atera zen Iñigo Lariz 26. Nahaste Borraste proban. Bizikletako proban bera izan zen indartsuena, eta hamar segundoko aldea atera zion Jorge Gonzalezi, honek baina, 25 kiloko zakua arinago eraman zuen bizkar gainean eta galdutako denbora berreskuratu zuen. Hala, elkarrekin hasi zuten antxintxika egin beharreko azken proba. Larizek indartsu ikusi zuen bere burua eta Gonzalez atzean lagatzea erabaki zuen, Conderen errekorra hobetzeko moduan egon zitekeela pentsatu baitzuen. Aurrera egin eta berehala barea sartu zitzaion ordea, eta erritmoa jaitsi behar izan zuen. Txakalaldia aprobetxatuz, Larizen pareraino ailegatu zen, beste behin, Jorge Gonzalez. Biak elkarrekin ailegatu ziren azken txanpanra, baina Errosario kalean jo zuen Larizek azken eraso erabakiorra eta bakarrik sartu zen Plaza Handiko helmugan. 

• Ikus hemen sailkapenak (PDF)

∞Azken irabazleak: 2009ko Nahaste Borraste proba David Condek irabazi zuen, 2008ko proba Iñigo Larizek irabazi zuen, Jose Antonio Ruizek 2007koa eta David Condek 2006koa.

•Argazkiak:

Iñigo Lariz helmugara iristen.	Jorge Gonzalez, bigarren sailkatua.
Gorka Iriondo, bosgarren sailkatua.	Jose Antonio Ruiz zakuarekin. Hirugarren postuan sailkatu zen.
Ikusle asko izan zituen probak eta ederki animatu zituzten kirolari saiatuak.	Parte hartzaile batzuek Albitxurin gora.
	Aurten 33 lagunek pate hartu dute.
Iñigo Lariz.	Ainhoa Lendinez.
Kategoria ezberdinetako irabazleak.

 

 

 

---

Notizi honen berri emateko