San Bartolome jaietan, baserritarren egunean (abuztuak 30), hain zuzen, egingo da aurten estreinakoz orain arte Gabon Zahar Feria egunean egiten zen Gazta Lehiaketa.

 

Bestalde, 26 urtean etenik gabe antolakuntza lanetan aritu den Goiko-Errota elkarteak gazta lehiaketa antolatzen jarraitzeari uko egin dio. Udalak, bere aldetik, San Bartolometako gazta lehiaketa antolatzeaz gainera, Gabon Zaharretan gazta lehiaketa antolatzen jarraitzeko asmoa azaldu du. Sariak irabazi dituzten gaztagile onenenen partaidetzarekin egingo luke Gabonetako lehiaketa. Jarri dira harremanetan Idiazabal jatorrizko deitura emateaz arduratzen den erakundearekin eta gonbidapen bidezko lehiaketa bat antolatzeko ideia aztertzen ari dira, hau da, beste txapelketetan sariak irabazi dituzten gaztagileak gonbidatuzko lituzkete Gabon Zahar Feriako Gazta Lehiaketan parte hartzeko.

Goiko-Errota elkartearen aspaldiko eskaera zen Gazta Lehiaketa egunez aldatzearena. Euren ustez, abendu amaiera ez da sasoirik egokiena. Batetik, urtezahar egunarekin bat egin dezakeelako, eta bestetik, gaztagile batzuk oraindik ez dauzkatelako lehiaketatara aurkezteko gaztak prest. Gaztagileek, gainera, begi onez ikusten dute lehiaketa San Bartolome jaietan egitea, abuztu bukaera sasoi aproposa baita pare bat aste beranduago egiten den Ordiziako gazta lehiaketa prestigiotsura aurkeztu beharreko gazten maila neurtzeko.

 

Udalak, azkenean, onartu du Goiko-Errotak proposatutako egun aldaketa, baina bakarrik geratu da antolakuntzan, Goiko-Errotak uko egin baitio lehiaketa antolatzeari 26 urte eta gero. Udalarekin antolakuntzaren inguruan izandako desadostasunak argudiatu dituzte eta joan zen otsailean egindako batzarrean hartu zuten erabakia.

• Gazta Lehiaketaren araudia eta oinarriak

  ∞ Lotura duten albisteak:

• Gabonak iruditan (2008-01-07 elgoiBARREN.net)

 

 

 

---

Notizi honen berri emateko