Katiuskak eta eskularruak jantzi, eta zakar poltsak eta aitzurrak eskuetan hartuta ibili dira gaur goizean Herri Eskolako 24 ikasle Sallobente errekako ertzak zikinkeriaz garbitzen. Eguraldi zoragarria egiten zuen Sallobente inguruan eta ez zaie gehiegi kosta errekara sartzea. Edarto ibili dira, baina baita lana gogotik egin ere.

 

 

Aurtengo ikasturtean Agenda 21 proiektuaren baitan energiaren gaia lantzeaz gainera, hondakinak eta horien gestioa ere ikutu dituzte, azaldu du Ander Zubizarreta Herri Eskolako irakasleak. Elgoibarko hondakinen egoeraren inguruko diagnosia ere egin dute, eta Deba ibaia eta erreketako ertzetan plastikozko poltsa larregi zeudela konturatu ziren. Hori ikusirik, esku hartu eta lanari ekitea erabaki zuten.

 

Gaur (ekainak 19) goizean 24 ikaslek gogotsu ekin diote erreka-ertzak garbitzeari. Udaleko brigadak laga dizkie erreka garbitzeko beharrezko materiala eta tresneria; aitzurrak, zakar poltsak, eskularruak, katiuskak, e.a.
Deba ibaiarekin konparazioan, nahiko garbi daude San Lorentzo errekako bazterrak, baina ikasleen lanaren fruituak berehala bistaratu dira. Uretan sartu eta era guztietako zakarrak hasi dira ateratzen: coca-cola latak, paper eta kartoiak, alkoholdun edarien beirazko boteilak… poltsak erdi betetzen hasita zeudela laga ditugu.

 

Argazkiak:

Katiuskak janzten.	Zakar poltsak betetzen.
Elkarlanean errazago egiten da lan.	Horiek baino 'altxor' hobeak ditu errekak.

 

---

Notizi honen berri emateko