Elgoibarko euskarazko hizkuntza ondarea digitalizatzeko egin diren lanak aurkezteko ekitaldia egin zuen atzo (ekainak 17) Udalak Kultur Etxeko hitzaldi gelan.

 

  Aurten, bi proiektu burutu dira Elgoibarko idatzizko eta ahozko ondarea bildu, digitalizatu, eta Interneten, guztion eskura, jartzeko, eta horiek aurkeztu zituzten atzoko ekitaldian.
Aurkezpenean izan ziren Alfredo Etxeberria, alkatea, Jon Peli Uriguen, euskara batzordeburua, eta Aintzane Agirrebeña, Badihardugu elkarteko teknikaria (goiko argazkian). Laguntzaile lanetan aritu zen Gotzon Barandiaren, Dijitalidadea enpresako teknikaria.

   •“Elgoibarko ahotsak” proiektua
    Lehendabizikoa, Badihardugu Euskara Elkarteak egin duen “Elgoibarko ahotsak” proiektua izan da. Lan honen helburu nagusia izan da, gure herriko nagusienen ahotik bertako ahozko ondarea jasotzea.
Badihardugu elkarteak orain arte herrian eginda dauden grabazioak batu ditu; proiektu honetarako, “Elgoibarko berbetia” eta “Elgoibartarren esanetan” proiektuetako elkarrizketak erabili baititu.

Ondoren, elkarrizketak kodifikatu, datu-basea antolatu eta transkribapenak egin ostean, bildutako ahozko ondarearen pasarterik interesgarrienak jarri dira Interneten. Hau da, elkarrizketatu bakoitzeko, gutxienez, pasarte bat jarri da sarean, zaletuek zein adituek entzuteko, kontsultatzeko eta ikertzeko aukera izan dezaten. Guztira 43 hizlari, 708 pasarte, eta 114 audio jarri dituzte.

• Ikus hemen: Elgoibarko ahotsak (ahotsak.com)
  

  •Elgoibarko kronika zaharrak digitalizatzeko proiektua
    Bestalde, ondarea digitalizatzeko aurten burutu den bigarren proiektua, Dijitalidadea enpresak egin duena izan da. Proiektu honen baitan, Elgoibarko kronika zaharrak digitalizatu eta Interneten jarri dira interesdun guztien eskura. Hori dela-eta, gure herriko bizimoduari buruz, 1930etik 1936 urtera bitarteko egunkarietan eta aldizkarietan argitaratu ziren kronikak eta albisteak bildu eta digitalizatu dira. Guztira, 394 kronika eta 1.607 albiste jarri dira Interneten

• Ikus hemen: Elgoibarko kronika zaharrak (elgoibar.org)
  

Udalak ezinbestekotzat jo du gure aurrekoen bizimodua eta gure herriaren historia jasota lagatzea, nahi duten guztiek ezagutzeko, erabiltzeko eta ikertzeko aukera izan dezaten. Horiek horrela, ekainaren 17ko ekitaldian aurkeztuko diren bi proiektuei esker, gure herriaren hizkuntza ondarea ez ezik, gure herriaren oroimen historikoa ere bilduta geldituko da, gozatu, erabili, ikertu… nahi duten guztien esku.

  ∞ Lotura duten albisteak:

• Euskal Herriko Ahotsak egitasmoa aurkeztu da (2008-04-16 elgoiBARREN.net) 
  

 

 

 

 

 

 

 

 

---

Notizi honen berri emateko