Apurtu da Igoera Fasean nagusi zen berdintasuna. Alcorta Forging Group taldeak 29-27 irabazi dio Catedra 70 taldeari, eta, honenbestez, elgoibartarrek irabazi dute Igoera Fasea eta honek saritzat zuen Lehen Nazional mailan jokatzeko txartela. Kalegoen plazan, 19:30ean, egingo duten ekitaldi xume batekin ospatu nahi dutela igoera aurreratu dute, guztiz egiaztatu gabe badago ere. (argazkiak dauzka)

 

Eguraldi txarra iragarrita dagoela-eta Kalegoen plazan egin behar zuten Hiruko saskibaloi torneoa Ikastolako frontoian egingo dute azkenean. Bihar (maiatzak 19) izango da, 10:00etatik aurrera.

Ikasleen artean osasunerako hezkuntza sustatu nahirik, irakaskuntzaren esparruan osasunaren hezkuntza landuko duten programak garatzeko laguntza eman du, aurten ere, Elgoibarko Udalak. Guztira, 16.480 euro banatu dituzte, lau ikastetxeren artean: Herri Eskola, Ikastola, Arreiturre, B.H Institutua eta Meka GLBHI.

 

Albisteak, erreportajeak, espezieen eta naturguneen informazio-fitxak, argazkiak, eta esteka eta liburu interesgarriak topa ditzakegu natura eta natur zientzien gaineko webgune berrituan. Antton Alberdi da webgunearen arduraduna, baina beste hiru elgoibartarrek ere parte hartzen dute: Eñaut izagirrek, Ander Izagirrek eta Haritz Arrietak.

 

Lambretta motoen zaleek aukera paregabea dute historia handiko moto horien inguruan hainbat xehetasun ikasi eta baita gainean ibiltzeko ere, Zubibai elkarteak domeka honetarako (maiatzak 20) antolatu duen Lambreta motoen bigarren topaketan.

 

Gaur hasi eta domekara bitartean jokatuko du Alcorta eskubaloi taldeak Lehen Nazional mailara igotzeko kanporaketa, Olaizaga kiroldegian. Sanloko arduradunek zaleen babesa eskatu dute eta gorriz jantzita joan daitezela eskatu diete. B.M. Leganes Madrilgo taldearen aurka jokatuko du Alcortak lehen partidua, gaur, 19:30ean.

 

 

Elgoibarko Udal Kirol Patronatuak antolatzen dituen Udako Kirol Udalekuetan izena emateko epea zabalik dago. Aurten, gainera, berrikuntzekin datoz Kirol Udalekuak. Izan ere, 1997 eta 2000 urteen artean jaiotako ikasleek, estreinakoz, errendimendu handiko campus batean parte hartzeko aukera izango dute. Ekainaren 25ean hasi uztailaren 20an bukatuko dira Kirol Udalekuak.

 

Dena prest dago jada festari ekiteko. Ludotekak Aste Nagusia antolatu du, hirugarren urtez, eta hainbat ekitaldi antolatu dituzte. Aste Nagusi bati dagokion legez, maiatzaren 18tik 26ra artean, zazpi egun izango ditu festak: Txupinazo Eguna, Artista Eguna, Sukaldari Eguna, Gazte Eguna, Txiki Eguna, Ludo Eguna eta Familia Eguna. (egitaraua dauka)

Eguaztenean egin zuen Elgoibarko Izarra kultur elkarteak bazkideen Batzar Orokorra, eta 90 bazkide inguru batu ziren Kultur Etxeko hitzaldi gelan. 2012-2013. urteak oso garrantzitsuak izango dira Elgoibarko Izarrarentzat, eta bi urte horietan hartu beharreko erabaki garrantzitsuenen berri eman zieten bazkideei. Horrez gain, Zuzendaritza Batzorde berria onartu zuen Batzar Orokorrak.

 

Arnaldo Otegiren aldeko plataformak eta Ongarri zine-klubak antolatuta, Gazta zati bat filma emango dute gaur (maiatzak 17), Herriko Antzokian. Jon Maiak zuzendu du filma, eta bera etorriko da pelikula aurkeztera.

 

CD Debabarrena areto futbol klubak egitarau zabala antolatu du barixakuan (maiatzak 18 ) hasi eta domera arte, Sumandu-Gehituz lelopean egingo den jaialdiaren barruan. 240 lagunentzako lekua prestatu dute, eta jana eta edana ez da faltako Madalako karpapean. Bertan, herritarrek adin guztietarako antolatu diren kalitatezko jarduera ugariz gozatzeko aukera izango dute. (egitaraua dauka)

 

Alemaniar itxura hartu zuen Madalako parkeak joan zen asteburuan, eta hiru egunez zerbezaren bueltan batu ziren elgoibartarrak. Jaia amaitu ostean, balorazioa egiteko unea iritsi da, eta antolatzaileek esandakoaren arabera, "dena primeran irten da". (argazkiak dauzka)

 

Domina uzta oparoa eskuratu dute Elgoibartik joandako ordezkariek EuskoSkills Lanbide Heziketako olinpiadetan. IMHko eta Mekako (ondoko argazkian) ikasleek urrezko bi domina, zilarrezko bi eta brontzezko beste bi lortu zituzten orotara, Irunen jokatutako probetan.

 

Elgoibar bakea eraikitzen herri mailako programaren aurkezpen publikoa eguen honetan, maiatzaren 17an, egingo dute. Elgoibarko Udalak, Arantzazu Baketik Fundazioak eta Lokarrik elkarlanean sustatutako egitasmoaren helburua, Elgoibartik herri honetan eta euskal gizarte osoan bizikidetza eta berradiskidetze-kultura sustatzen laguntzea da.

 

Berdinketa lortzearekin nahikoa bazuten ere, Urola taldeari 1-0 irabazi zion CD Elgoibarko emakumezkoen taldeak, zapatuan, Mintxetan jokatu zuten denboraldiko azken partidan. Garaipen honekin Kopa txapelketa irabaztea lortu dute jokalari elgoibartarrek.

Barixakuan hasi eta domekan bukatu zen Olatu Talka, Donostia 2016ko Europako kultur hiriburu dela ospatzeko ekitaldi erraldoia. Kulturak bere baitan izan ditzakeen adierazpide eta espresio mota gehienak elkartu zituen jaialdiak, Donostia ez ezik, Gipuzkoako hainbat herri ere zipriztindu zituen. Elgoibarren, esaterako, Dance&Smile hip hop dantza taldearen eskutik, gogor jo zuen Olatu Talkak. (bideoa eta argazkiak dauzka)

Bateragune auzian Espainiako Auzitegi Gorenak emandako epaia “zentzugabea” dela salatu zuten Otegiren aldeko herri plataformak zapaturako deitutako manifestaziora batu zirenek. (argazkiak eta bideoak dauzka)

Lainoa dela-eta Elgoibar inguratzen duten mendiek eskaintzen duten bista ederrez gozatu ezin izan zuten arren, mendian ibiltzeko eguraldi aproposa izan zuten, joan den zapatuan, Elgoibarko Itzulian eta Itzulitxoan parte hartu zuten ia 400 lagunek. (Bideoa eta argazkiak dauzka)